Lənkəran şəhərində yerləşən, Həzi Aslanovun adını daşıyan parkın vəziyyəti yerli sakinlərin narazılığına səbəb olub.
Cenublu.az xəbər verir ki, sakinlərin sözlərinə görə, parkdakı uşaqlar üçün nəzərdə tutulmuş yelləncəklər uzun müddətdir istifadəyə yararsız haldadır. Əvvəllər sadəcə sınmış yelləncəklər indi tamamilə sökülərək aparılıb, lakin onların yerinə yeniləri qoyulmayıb və heç bir təmir işləri görülməyib.
Parkın ümumi vəziyyəti də ürəkaçan deyil. Sakinlər bildirirlər ki, ərazidəki zibil qabları dolub-daşır. Gözəl istirahət guşəsi olmaq əvəzinə park baxımsızlıq və səliqəsizlik nümunəsinə çevrilib.
Sakinlər aidiyyəti qurumlardan parkın bərpası və təmizliyi ilə bağlı təcili tədbirlər görülməsini tələb edirlər. Onlar hesab edirlər ki, uşaqların istirahəti və vətəndaşların rahatlığı üçün bu cür ictimai məkanlara xüsusi diqqət yetirilməlidir.
Xatırladaq ki, sözügedən parkla bağlı bir neçə dəfə də sakinlərin narazılıqlarını işıqlandırmışıq.
View this post on Instagram
