Lənkəran şəhərində “Sağlam bədəndə sağlam ruh” devizi altında şagirdlərlə görüş keçirilib. Bu haqda məlumatı Cenublu.az bu gün, 14 dekabr tarixində verir.
Tədbir Lənkəran şəhər 8 nömrəli tam orta məktəbində baş tutub. Burada Lənkəran-Astara Regional Gənclər və İdman İdarəsinin əməkdaşı, taekvondo idman növü üzrə baş məşqçi, Peşəkar İdman Klubunun prezidenti, Əməkdar məşqçi Vüqar Sultanov və çempion Yusif Qurbanov, məktəbin direktoru və 70 şagird iştirak ediblər.
İştirakçılara sağlam həyat tərzindən, idmançıların əldə etdikləri uğurlar, rayonda olan idman qurğuları, idman növləri, nəzərdə tutulmuş idman yarışları, regionda, o cümlədən Lənkəranda idmanın inkişafı üçün yaradılan şərait barəsində geniş məlumat verilib.
Görüşün keçirilməsində məqsəd idmanın kütləviliyinin artırılması və qızların idmana cəlb olunmasıdır.
Yekunda sağlam həyat tərzinin və idmanın təbliği ilə bağlı videoçarxlar təqdim edilib.
Qeyd edək ki, tədbir adıçəkilən idarənin təşkilatçılığı, Lənkəran-Astara Regional Təhsil İdarəsinin dəstəyi ilə həyata keçirilib.
