Lənkəranda məktəblilərin ölümü ilə nəticələnən yol-nəqliyyat hadisəsi ilə bağlı cinayət işi başlanıb.
Apa.az xəbər verir ki, qəza ilə bağlı Lənkəran Rayon Polis Şöbəsində Cinayət Məcəlləsinin 263-cü maddəsi üzrə cinayət işi açılıb, istintaq hərəkətləri davam etdirilir.
Qeyd edək ki, hadisə ötən gün Lənkəran–Lerik magistralının Şovu kəndi ərazisində baş verib. Hərəkətdə olan "Mercedes" markalı avtomobil məktəbə gedən şagirdlər – 2017-ci il təvəllüdlü Gülay Əlizadəni və onun qardaşı, 2014-cü il təvəllüdlü Ramid Əliyevi vurub.
Hər iki məktəbli ağır vəziyyətdə Lənkəran Rayon Mərkəzi Xəstəxanasına çatdırılsa da, onların həyatını xilas etmək mümkün olmayıb.
Qəzanı törədən "Mercedes" markalı avtomobil hadisədən sonra idarəetməni itirərək yol kənarına çıxıb.
Faktla bağlı araşdırma aparılır.
