Lənkəran Rayon Mərkəzi Xəstəxanasında “Leykemiya hökm deyil” adlı tədbir baş tutub. Bu haqda məlumatı Cenublu.az bu gün, 2 oktyabr tarixində verir.
Giriş sözü ilə çıxış edən mərkəzin direktoru Mehriban Bağırova bildirib ki, Azərbaycanda qan xərçəngi (leykemiya) haqqında yanlış stereotiplərin aradan qaldırılması üçün aksiyalar, maarifləndirici seminarlar, televiziya və radio verilişləri, sosial çarxın çəkilişi kimi müxtəlif səpkidə tədbirlərin keçirilməsi zəruridir.
Tədbirdə Akademik M.Ə.Mirqasımov adına Respublika Klinik Xəstəxanasının həkim-hematoloqu Firəngiz Nəzərli “Leykemiyalarda kimyəvi terapiya və qidalanma”, Totem psixologiya Mərkəzinin psixoloqu Aynur İsmayılova “Xəstəlik taleyimiz deyil” mövzularında təqdimatlarla çıxış ediblər.
Sonda “Leykemiya ilə mübarizə” İctimai Birliyinin üzvü Dilşad Əzizli təşkilatın gördüyü işlər haqqında geniş məlumat verib və iştirakçılar videoçarx izləyiblər.
Qeyd edək ki, tədbir Tibbi Ərazi Bölmələrini İdarəetmə Birliyinin (TƏBİB), Azərbaycan Respublikasının Səhiyyə Nazirliyi və “Leykemiya ilə mübarizə” İctimai birliyinin birgə layihəsi çərçivəsində baş tutub.
