Lənkəran rayonunun Lüvəsər kənd məscidində bıçaqlanma hadisəsi baş verib. Bu haqda məlumatı Cenublu.az bu gün, 29 sentyabr tarixində verir.
Belə ki, kənd məscidinin axundu 37 yaşlı Taleh Elman oğlu Əliyev məscidin həyətində olarkən kənd sakini Çingiz Əlizadə ona çoxsaylı bıçaq zərbələri endirib. Xəsarətlər alan dərhal Lənkəran Rayon mərkəzi xəstəxanasının reanimasiya şöbəsinə yerləşdirilib.
Məsələ ilə bağlı DİN-in mətbuat xidmətinin Lənkəran regional qrupunun baş inspektoru, polis baş leytenantı Məhəmməd Rzayev bildirib ki, hadisə şəxsi münasibətlər zəminində mübahisə nəticəsində baş verib.
Hadisəni törətməkdə şübhəli bilinən şəxs saxlanılıb.
Lənkəran ŞRPŞ-də faktla bağlı cinayət işi başlanılıb. Araşdırma aparılır.
