Lənkəranda itkin düşmüş hesab edilən balıqçı Mahmud İbayevin axtarışları gücləndirilmiş iş rejimində davam edir.
Cenublu.az xəbər verir ki, Mahmud İbayevin axtarışı üçün əraziyə Fövqəladə Hallar Nazirliyinin Cənub Regional Mərkəzinin Kiçik həcmli Gəmilərə Nəzarət və Sularda Xilasetmə Dövlət Xidmətinin xilasediciləri, aviasiya dəstəsinin helikopteri, Dövlət Sərhəd Xidmətinin Sularda mühafizə hissəsinin əməkdaşları, eləcə də yerli balıqçılar cəlb olunub.
Mahmud İbayevin qardaşı Rəşad İbayev bildirib ki, balıqçı Nazim Abbasovun meyiti aşkar olunduqdan sonra bütün qurumlar gücləndirilmiş iş rejimində qardaşımın axtarışlarını aparır:
"FHN-ə müraciət etmişik ki, sularda dalğıc-axtarış qrupu dənizin dərinliyinə düşüb baxsınlar. Ola bilər ki, dənizin hansısa dərinliyində torlara ilişib qalsın".
Qeyd edək ki, yanvarın 13-də 1984-cü il təvəllüdlü Mahmud İbayev və 1968-ci il təvəllüdlü Nazim Abbasov itkin düşmüş hesab edilmişdi. Fevralın 2-də balıqçılardan biri – Nazim Abbasovun meyiti tapıldı.
