Lənkəranda fəaliyyət göstərən çörək istehsalı müəssisəsində qanun pozuntuları aşkar edilib. Bu haqda bu gün, 2 mart tarixində Cenublu.az AQTA-ya istinadən xəbər verir.
Qida Təhlükəsizliyi Agentliyinin verdiyi məlumata əsasən, Lənkəran şəhəri, H.Abdullayev, 27 ünvanında fəaliyyət göstərən fiziki şəxs Rəcəbov Qurban Malik oğluna məxsus çörək istehsalı müəssisəsində aparılmış plandankənar yoxlama zamanı qida təhlükəsizliyi sahəsində normativ hüquqi aktların, sanitariya norma və qaydalarının tələblərinin pozulduğu müəyyən edilib.
Belə ki, müəssisədə sanitar-texnik və sanitar-gigiyenik vəziyyətin qənaətbəxş olmadığı, havalandırma sisteminin quraşdırılmadığı, qida məhsullarının emalı sahəsində səthlərin, xüsusilə də qida ilə təmasda olan işçi masalarının səthlərinin asan təmizlənməsinə və dezinfeksiya işlərinin aparılmasına imkan verən tərzdə təchiz edilmədiyi, yuyucu maddələr və dezinfeksiyaedici vasitələrin saxlanılması üçün xüsusi yerlərin ayrılmadığı və digər nöqsanlar aşkar edilib. Aşkar edilmiş faktlarla bağlı qanunvericiliyə uyğun olaraq, sahibkar barəsində inzibati protokol tərtib edilib, müəssisənin fəaliyyəti məhdudlaşdırılıb.
