Lənkəran rayonunda “Çəltiyin seleksiyası və toxumçuluğunun təşkili” mövzusunda tarla seminarı baş tutub. Bu haqda məlumatı Cenublu.az bu gün, 5 sentyabr tarixində Azərtac-a istinadən verir.
Tədbirdə ölkəmizdə çəltikçilik sahəsində mövcud çətinliklərin aradan qaldırılması, çəltik bitkisinin əkin sahələrinin artırılması, məhsuldarlığın və məhsulun keyfiyyətinin yüksəldilməsi, ixrac yönümlü, rəqabət qabiliyyətli məhsul istehsalı, idxaldan asılılığın aradan qaldırılması və digər mövcud məsələlərə toxunulub.
Tədbir zamanı nazirliyin “Bitkiçiliyin təşkili və monitorinqi” şöbəsinin müdiri İmran Cümşüdov “Çəltikçiliyin Ərzaq Təhlükəsizliyinin təmin edilməsində əhəmiyyəti”, Əkinçilik Elmi-Tədqiqat İnstitutunun direktoru Faiq Xudayev “Çəltikçilik üzrə Dövlət Proqramının icra vəziyyəti”, Lənkəran Dayaq Məntəqəsinin müdiri Təyyub Rzayev “Çəltiyin becərmə texnologiyası”, ƏETİ-nin “Bitki seleksiyası” şöbəsinin müdiri Abidin Abdullayev “Yeni sortların yaradılması və toxumçuluğun təşkili” mövzularında çıxış ediblər.
Seminarda Kənd Təsərrüfatı Nazirliyinin, Aqrar Xidmətlər Agentliyinin, bölgə Dövlət Aqrar İnkişaf Mərkəzlərinin nümayəndələri, çəltikçiliklə məşğul olan mütəxəssislər və bölgə fermerləri iştirak ediblər.
Qeyd edək ki, seminar KTN-in və ƏETİ-nin birgə təşkilatçılığı ilə baş tutub.
