Lənkəran rayonunda sentyabrın 27-də Anım Günü qeyd edilib. Bu haqda məlumatı Cenublu.az verir.
Şəhidlər Abidə Kompleksində keçirilən tədbir şəhidlərimizin xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb.
Tədbirdə Lənkəran Şəhər İcra Hakimiyyətinin başçısı Taleh Qaraşov, icra aparatının kollektivi, hüquq-mühafizə orqanlarının rəhbərləri, şəhid ailələrinin üzvləri, qazilər, müharibə veteranları və rayon ictimaiyyəti iştirak ediblər.
Tədbir zamanı şəhid övladlarının və məktəblilərin iştirakı ilə bədii-kompozisiya təqdim olunub. Tədbir sonunda isə rayon rəhbərliyi və eləcə də ictimaiyyət nümayəndələri abidə kompleksini ziyarət edib, önünə tər güllər düzüblər.
Anım Günü ilə bağlı rəsmi tədbirdən sonra Lənkəran ŞİH başçısı Taleh Qaraşov, hüquq-mühafizə orqanlarının rəhbərləri və İcra Hakimiyyətinin kollektivi Lənkəran rayonundan olan şəhidlərimizin qəbirlərini ziyarət ediblər, ailələrinə başsağlığı verib qayğıları ilə maraqlanıblar.
Qeyd edək ki, sentyabrın 27-də, Vətən müharibəsinin ilk günündə şəhid olan Lənkəran rayon sakinləri – polkovnik-leytenant Mehman Şirvanov və Qalib Əkbərzadənin məzarları da ziyarət olunub, önlərinə tər güllər düzülüb.
