Lənkəranda ruhi xəstə FHN əməkdaşını bıçaqlayıb.
Cenublu.az-ın əldə etdiyi məlumata görə, hadisənin istintaqı Lənkəran Ağır Cinayətlər Məhkəməsinin hakimi Xamməd Nuriyevin sədrliyi ilə keçirilib.
Belə ki, Cavid Qədirov (ad şərtidir) 1970-ci ildə Lənkəran şəhərində anadan olub. O, uzun müddət ruhi xəstəlikdən əziyyət çəkib. Psixoloji durumu yerində olmadığı üçün evin qapısını bağlayaraq anasına içəri keçməyə icazə verməyib. Anası Fidan Qədirova (ad şərtidir) oğlunun qapını açmadığını görüb Fövqəladə Hallar Nazirliyinin Xüsusi Riskli Xilasetmə Xidmətinə zəng edib. FHN əməkdaşı qapını açaraq içəri daxil olarkən Cavid Qədirov onu bıçaqlayıb.
Cavid Qədirov Azərbaycan Respublikası CM-nin 126.2.2 və 315-ci maddəsi ilə təqsirləndirilib.
Lakin istintaq zamanı Cavid Qədirovun hadisəni anlaqsız vəziyyətdə törətdiyi sübuta yetirilib. Onun cinayət məsuliyyətindən və cəzadan azad edilməsi, barəsində tibbi xarakterli məcburi tədbirlərin tətbiq edilməsi barədə əsaslar ortaya çıxıb.
Cinayət işinin materiallarında olan məhkəmə-psixiatrik ekspertizasının rəyindən görünür ki, təqsirləndirilənin həmin vaxtdakı psixi durumu istintaq hərəkətləri aparılmasına, o cümlədən dindirilməsinə imkan verməyib. Məhkəmə iclasında da eyni vəziyyətdə olduğundan ifadə verməsi mümkün olmayıb.
Məhkəmədə zərərçəkmiş şəxs ifadəsində göstərib ki, 2011-ci ildən Azərbaycan Respublikası FHN-nin XRXX-nin Çevik Xilasetmə İdarəsində baş çavuş rütbəsində xilasedici vəzifəsində işləyir:
“Xidmətdə olarkən “112” qaynar xəttinə vətəndaşın bağlı qapı arxasında qalması barədə məlumat daxil oldu. Xidmət yoldaşlarımla birgə hadisə yerinə getdik. Ora çatdıqda yaşlı qadının mənzilin qarşısında gözlədiyini gördük. Qadın bizə oğlunun ruhi xəstə olduğunu, 3 gündür qapını açmadığını bildirdi. Ruhi xəstə olduğu üçün polis əməkdaşlarını və ruhi-əsəb xəstəxanasının həkim briqadasını gözlədik. Onlar gəldikdən sonra xüsusi qurğu ilə qapını açdıq. Evin işıqları sönülü vəziyyətdə idi. Cavid əlindəki bıçaqla qarın nahiyəmə vurdu. Polis əməkdaşları onu zərərsizləşdirib saxlayıblar”.
Sonda məhkəmə Cavid Qədirovun hadisəni anlaqsız vəziyyətdə törətdiyi üçün məsuliyyətdən azad edib. Onun barəsində tibbi xarakterli məcburi tədbirlər təyin edilib.
Fidan İlqar
