Lənkəranda XX əsrin əvvəllərində inşa olunan bina dağılmaq üzrədir. Bu haqda məlumatı Cenublu.az bu gün, 6 sentyabr tarixində Apa.az-a istinadən verir.
Belə ki, binanın dam örtüyü dəyişilsə də, yağış yağan zaman yenə də evlərə su damır. Divarlarda çatlar əmələ gəlib, döşəmə tamamilə dağılıb. Döşəmənin qəzalı vəziyyətinə görə sakinlərdən biri binanın zirzəmi hissəsinə düşüb və çoxsaylı xəsarətlər alıb.
Məsələ ilə bağlı Şəhər Mənzil Təsərrüfatı idarəsinin rəisi İlham Mirzəzadə bildirib ki, bina ötən əsrin əvvəllərində tikilib və 26 mənzildən ibarətdir:
“Bir müdddət əvvəl "Azərdövlətlayihə" Dövlət Baş Layihə İnstitutunun əməkdaşları ilə birgə keçirdiyimiz baxış zamanı bina əsaslı təmirə əlverişsiz sayılıb. Qısa vaxt ərzində ayrılacaq dövlət vəsaiti hesabına sakinlər üçün yeni bina tikilib təhvil veriləcək".
İdarə rəisi onu da bildirib ki, yeni bina tikilib başa çatana kimi sakinlərin kirayə haqları da dövlət tərəfindən qarşılanacaq.
