Lənkəran rayonu Şovu kənd M.Cəbrayılov adına tam orta məktəbdə sağlam həyat tərzinin təbliği məqsədilə gənclərlə “Sağlam gələcək naminə narkomaniyaya yox deyək!” adlı görüş keçirilib. Bu haqda məlumatı Cenublu.az bu gün, 4 oktyabr tarixində Lənkəran şəhər Gənclər və İdman İdarəsinə istinadən verir.
Tədbirdə iştirak edən Lənkəran-Astara Regional Təhsil İdarəsinin əməkdaşı Cəmil Axundzadə, Lənkəran Şəhər Gənclər və İdman İdarəsinin əməkdaşları Yusif Xamiyev və Elnurə Qəniyeva narkomaniyanın və digər zərərli vərdişlərin fəsadları, onların sağlamlığa və insan mənəviyyatına vurduğu ziyandan bəhs ediblər. Həmçinin idmanın, sağlam həyat tərzinin, erkən yaşlardan fiziki fəal həyat sürməyin faydalarından danışıblar.
Sonra idarənin nəzdində fəaliyyət göstərən Uşaq Gənclər İdman Məktəbinin yetirməsi, ağır atletika üzrə qadınlar arasında 49 kq-da Azərbaycan çempionu olmuş Türkanə Qənbərzadə öz idman yolu və uğurları haqqında məlumat verib.
Sonda gənclərə zərərli vərdişlərin fəsadları və idmanın təbliğ edilməsi məqsədilə videoçarx nümayiş olunub.
Qeyd edək ki, görüş Lənkəran Şəhər Gənclər və İdman İdarəsi və Lənkəran-Astara Regional Təhsil İdarəsinin birgə təşkilatçılığı ilə keçirilib.
