Lənkəran şəhər İcra Hakimiyyətinin başçısı Taleh Qaraşov şəhid kapitan Vüsal Tahir oğlu Quliyevin və Samir Məhərrəm oğlu Quliyevin anım mərasimlərində iştirak edib. Bu haqda məlumatı Cenublu.az bu gün, 29 sentyabr tarixində Lənkəran ŞİH-ə istinadən verir.
İcra başçısı şəhid ailələrinin üzvləri ilə söhbət edib, qayğı və problemləri ilə maraqlanıb. Daha sonra şəhid ailələrinin və yerli ictimaiyyətin nümayəndələrinin iştirakı ilə şəhidlərimizin məzarlarını ziyarət edib, qəbirləri üzərinə tər gül dəstələri düzüb, ruhlarına dualar edib.
Suqovuşan döyüşləri zamanı şəhid olan kapitan Vüsal Quliyev hələ sağlığında dövlət başçısının Sərəncamı ilə "Azərbaycan Ordusunun 100 illiyi" yubiley medalına layiq görülüb. Ölümündən sonra isə "Vətən uğrunda", "Füzulinin azad olunmasına görə" və "Qubadlının azad olunmasına görə" medalları ilə təltif olunub.
Samir Məhərrəm oğlu Quliyev isə ölümündən sonra İlham Əliyev tərəfindən "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilib.
