Lənkəran şəhəri, Vasif Məmmədov küçəsinin sakini Rəşid Məmmədov Cenublu.az-a müraciət edərək bildirib ki, gediş-gəliş üçün istifadə etdiyi yol qonşusu tərəfindən qeyri-qanuni zəbt olunub.
Məsələ ilə bağlı Lənkəran şəhər İcra Hakimiyyətinə müraciət etdik. Qurumdan bildirildi ki, İcra Hakimiyyəti əməkdaşlarının, aidiyyəti mütəxəssislərin, özünün və ərazidə yaşayan torpaq mülkiyyətçilərinin iştirakı ilə araşdırma aparılıb:
“Müəyyən edilmişdir ki, şikayətçi Rəşid Məmmədov, qonşuları Cavahir Məmmədova və Asif Məmmədov uzun müddətdir sözügedən torpaq sahəsindən gediş-gəliş yolu kimi istifadə edirlər. Asif Məmmədov istifadəsində olan 0.04 ha həyətyanı torpaq sahəsində anbar tikintisi həyata keçirdikdən sonra Rəşid Məmmədov həmin anbarın müəyyən hissəsinin gediş-gəliş yolunun üzərində inşa edildiyini iddia etdiyindən tərəflər arasında narazılıq yaranmışdır.
Araşdırma zamanı Asif Məmmədovun istifadəsində olan 0.04 ha torpaq sahəsinin JN-1894A KOD:80201002 nömrəli torpağın mülkiyyətə verilməsinə dair şəhadətnamə ilə mərhum atası Məmmədov Dənizxan Hüseyn oğluna rayon Aqrar İslahat Komissiyası tərəfindən 1998-ci il tarixli, 10 saylı qərar ilə ayrıldığı müəyyən edilmiş, lakin vətəndaş həmin torpaq sahəsinə dövlət reyestrindən çıxarış əldə etmədiyindən torpaq sahəsinin naturada koordinatlarının dəqiqləşdirilməsi mümkün olmamışdır. Məsələnin qanunamüvafiq həllindən ötrü A. Məmmədova atası Dənizxan Məmmədova şəhadətnamə ilə ayrılmış 0.04 ha torpaq sahəsinə müvafiq çıxarış əldə etmək üçün Daşınmaz Əmlakın Dövlət Kadastr və Reyestri Publik Hüququ Şəxsin 10 saylı Ərazi İdarəsinə müraciət etməsi bildirilmişdir. Aidiyyəti mütəxəssislər tərəfindən anbarın tikintisi saxlanılmışdır. Eyni zamanda A.Məmmədova idarənin mütəxəssisləri tərəfindən ölçü işləri aparılan zaman qeyd olunan anbarın ümumi istifadə üçün ayrılmış torpaq sahəsinə düşəcəyi təqdirdə qanunamüvafiq tədbirlər görüləcəyi diqqətinə çatdırılmışdır. Tərəfimizdən Rəşid Məmmədova yuxarıda qeyd olunanlarla bağlı ətraflı məlumat verilmişdir”.
https://cenublu.az/storage/photos/2023/10/Cenublu-Logo-1x1_11.mp4
