Gəgiran kəndində Vətən müharibəsi şəhidi Baloğlan Əhədlinin xatirəsinə inşa olunan kompleksin açılışı olub. Bu haqda bu gün, 28 sentyabr tarixində Cenublu.az Lənkəran ŞİH-yə istinadən xəbər verir.
Kompleks şəhidlərimizin əziz xatirəsinin əbədiləşdirilməsi məqsədilə ucaldılıb. Açılış mərasimində Lənkəran ŞİH-nin əməkdaşları, şəhid ailələri, qazilər və rayon ictimaiyyəti iştirak ediblər. Sentyabrın 27-də - Anım Günündə baş tutan tədbirdə Lənkəran ŞİH-nin başçısının müavini Mikayıl Cəfərzadə xatirə kompleksinin açılışını şəhidin atası Şakir Əhədovla birgə edib.
Qonaqların və şəhidin atasının çıxışlarından sonra məktəblilərin ifasında qəhrəman Vətən övladlarına həsr olunan şeirlər səsləndirilib.
Mərasimdən sonra iştirakçılar şəhidlərimizin məzarlarını ziyarət edib, qəbirləri üzərinə tər çiçəklər düzüblər.
Şəhid Baloğlan Əhədli "İgidliyə görə", "Vətən uğrunda", "Qubadlının azad olunmasına görə", "Füzulinin azad olunmasına görə" və "Şuşanın azad olunmasına görə" medalları ilə təltif edilib.
