Lənkəran rayonu Natiq Aslanov adına Ləj kənd tam orta məktəbində infrastrukturda ciddi çatışmazlıqlar olduğu bildirilib.
Cenublu.az-a müraciət edən kənd sakinləri məktəbdə vətənpərvərlik ruhunun yüksəldilməsi üçün nəzərdə tutulan hərbi otağın və hərbi praktiki ləvazimatların olmamasını da vurğulayıblar.
Həmçinin məktəbdə informatika otağının mövcud olmaması, informatika dərslərində masaüstü kompüterlərin tələb olunmasına baxmayaraq, onların təmin edilməməsi bildirilib. Akt zalı, fizika və kimya dərsləri üçün laboratoriya otaqları da çatışmır.
Şikayətçilər qeyd ediblər ki, məktəbdə uşaqların fiziki inkişafı və sağlam böyüməsi üçün vacib olan idman zalı belə yoxdur: “Qışda və yağışlı havalarda qapalı idman zalının olmaması səbəbindən uşaqların idman oyunları oynaya bilməməsi də məktəbin acı reallığıdır”.
Xatırladaq ki, Azərbaycan Respublikasının Milli Qəhrəmanı Əsgər Əliyev də bu məktəbin məzunudur.
