Lənkəran rayonu Boladi kənd bələdiyyəsinin sədri Salman Dadaşov yaxın qohumlarının kəndin örüş sahələrində və sakinlərin pay torpaqlarındakı ağacları kəsərək qaz olmayan kəndlərdə satdıqları ilə bağlı bəzi KİV-də yayılmış iddialara münasibət bildirib.
Cenublu.az-a açıqlama verən Salman Dadaşov anonim şəkildə qaldırılan iddiaların sahiblərindən həmin kəsilmiş ağacların yerinin onlara da göstərilməsini söyləyib.
“Örüş sahəsində ağac ola bilməz, həmin yer mal-qaranın otarılması üçün nəzərdə tutulduğuna görə oraya xüsusi nəzarət edilmir və sahibsiz formada heyvanlar oraya buraxılır. Pay torpağına gəldikdə isə, hər bir pay torpağı hasarlanır və o sahələrə torpaq sahibindən başqa heç kəs müdaxilə edə bilməz. Həmin torpaqlarda ağac kəsiminə cavabdeh məhz oranın sahibidir”, - deyə bələdiyyə sədri deyib
S.Dadaşov qeyd edib ki, müvafiq tədbir görülməsi üçün ağacın harada kəsildiyini bilmək vacibdir:
“Həmin ağaclar harada kəsilibsə, bizə yerini desinlər. Kəsən hər kimdirsə, birincisi, bu onun pay torpağıdırsa, onun öz mülküdür. Lakin qanunla həmən adama cərimə düşürsə, o, mənim qohumum olsa belə, cəzalandırılacaq”.
Dadaşov əlavə edib ki, iyirmi ildir ki, bələdiyyə sədridir.
“Məni bu cür şantajlarla ləkələyə bilməzlər, özümə tam arxayınam və belə bir şey mümkün deyil” - deyə bələdiyyə başçısı bildirib.
