Təhsilin İnkişafı Fondunun nümayəndə heyəti Lənkəran Dövlət Universitetində müəllim və tələbələrlə görüş keçirib.
Cenublu.az universitetə istinadən xəbər verir ki, görüşün məqsədi Fondun fəaliyyəti, həyata keçirdiyi layihələr barəsində universitetin elmi-pedaqoji heyətinin, tələbələrinin məlumatlandırılması olub.
Lənkəran Dövlət Universitetinin rektoru, prof.Natiq İbrahimov universitetdə təhsilin modernləşdirilməsi istiqamətində son illərdə görülən çoxşaxəli işləri qonaqların diqqətinə çatdırıb. N.İbrahimov Təhsilin İnkişafı Fondunun gördüyü işləri yüksək qiymətləndirərək, Fond ilə əməkdaşlığın Lənkəran Dövlət Universiteti üçün faydalı olacağını bildirib.
Təhsilin İnkişaf Fondunun İdarə Heyətinin sədri Elnur Nəsibov “TələbəPlus” layihəsi barədə təqdimatla çıxış edərək tələbələrin sözügedən layihə və digər layihələrlə bağlı suallarını cavablandırıb.
Görüşün yekununda “TələbəPlus” və “IELTS imtahanına təşviq” layihələri çərçivəsində birgə əməkdaşlıq müqavilələri imzalanıb.
