Elm və Təhsil Nazirliyinin Akkreditasiya Şurasının 2023-cü il üzrə ikinci iclası baş tutub. Bu haqda məlumatı Cenublu.az bu gün, 20 sentyabr tarixində verir.
İclasda Təhsildə Keyfiyyət Təminatı Agentliyinin idarə heyətinin sədri Ülkər Səttarova Lənkəran Dövlət Universitetində həyata keçirilmiş institusional akkreditasiya qiymətləndirmələri əsasında müvafiq komissiyalar tərəfindən hazırlanmış hesabat və təhlilləri təqdim edib.
İclasda keçirilmiş səsvermənin nəticələrinə uyğun olaraq, Lənkəran Dövlət Universitetinin institusional akkreditasiya nəticəsi “əsasən, uyğundur” hesab edilib və müəssənin növbəti 5 il müddətinə akkreditasiya olunması haqqında qərar verilib.
Qeyd edək ki, cari ildə ümumilikdə 10 ali təhsil müəssisəsinin akkreditasiya qiymətləndirməsi yekunlaşdırılıb. İlin sonunadək daha 3 ali təhsil müəssisəsinin (ADA Universiteti, Bakı Mühəndislik Universiteti və Azərbaycan Tibb Universiteti) institusional akkreditasiya qiymətləndirməsi planlaşdırılır.
