Lənkəranda fəaliyyət göstərən müəssisə xarici ölkələrə qənnadı məhsulları ixrac edəcək. Bu haqda bu gün, 7 mart tarixində Cenublu.az Azərtac-a istinadən xəbər verir.
Lənkəranda qənnadı məhsullarının istehsalı ilə məşğul olan, “Made in Azerbaijan” brendi altında istehsal etdiyi məhsullarını xarici bazara çıxarmağa nail olan Nurlan Nurəliyev belə sahibkarlardan biridir. Onun yaratdığı müəssisə 2020-ci ildən “La RAN” MMC adı ilə fəaliyyət göstərir. Hazırda burada 120 nəfərə yaxın işçi çalışır.
Şirkət məhsul istehsalı üçün lazım olan xammalın böyük qismini Azərbaycanın yerli tədarükçülərindən əldə edir. Amma bəzi xammallar – xüsusi yağlar, bir sıra qatqılar xaricdən, xüsusən də Rusiya və Türkiyədən idxal edilir.
Sahibkarın sözlərinə görə, şirkət dörd kateqoriya üzrə məhsul istehsal edir. Bunlar lokum, marmelad, orta sinif konfetlər və premium sinfə aid brend şokoladlardır. İl ərzində 2500 tona yaxın məhsul istehsal edən şirkət bunun 300 tonunu xaricə göndərir, qalanı isə daxili bazarın tələbatının ödənilməsi üçün yerli bazara çıxarılır.
Şirkətin məhsulları Rusiya, Özbəkistan, Qırğızıstan və Türkmənistana ixrac olunur. Yaxın aylarda isə “La RAN” məhsullarını Moldovaya ixrac etməyə başlayacaq. Bu ölkəyə orta seqmentə aid olan şokolad və konfetlərin ixracı nəzərdə tutulur. Gələcəkdə İsrailə və Ərəb ölkələrinə də məhsul ixracı planlaşdırılır. Artıq bununla bağlı təkliflər alınıb və yoxlanış üçün məhsul nümunələri göndərilib.
