Koreya Respublikasının Azərbaycandakı fövqəladə və səlahiyyətli səfiri Li İn-Yonq Lənkəran rayonunu ziyarət edib. Bu haqda məlumatı Cenublu.az bu gün, 16 dekabr tarixində verir.
Görüşdə koreyalı diplomat və Lənkəran şəhər icra başçısı Taleh Qaraşov iştirak ediblər. Taleh Qaraşov xarici qonağa Lənkəranın tarixi, coğrafi mövqeyi, ictimai-siyasi və sosial-iqtisadi həyatı, həmçinin iqtisadi əlaqələrin mümkün perspektivləri barədə ətraflı məlumat verib.
Səfir ölkələrimiz arasında əlaqələrin inkişafından danışıb. O, kənd təsərrüfatı sahəsində əlaqələrin inkişafında daha çox maraqlı olduqlarını qeyd edib və bu istiqamətdə Lənkəranla mümkün əməkdaşlığın perspektivlərinə toxunub.
Koreyalı diplomat səfər çərçivəsində “Lənkəran Konserv” ASC, “Azərsun Holding”in konserv kombinatı, “Azərxalça” ASC-nin Lənkəran filialı, “Beta Azərbaycan” şirkətinin çəltik emalı zavodu, “Yaşıl çay” FT-nin çay fabrikinin fəaliyyəti ilə tanış olub, “Hallabonq” sitrus meyvələri və çay plantasiyalarına, həmçinin çəltik sahəsinə baxış keçirib və Xanbulançay dəryaçasını ziyarət edib.
