Bakının Xətai rayonunda yaşayan 29 yaşlı Cəlilabad sakini Yəhya ailə münaqişəsi zamanı həyat yoldaşı Süsənə xəsarət yetirib. Hadisə onların mənzilində gecə saat 00:20 radələrində baş verib.
Demokrat.az xəbər verir ki, aralarında yaranmış mübahisə zamanı o, qəsdən əl zərbələri ilə baş və bədəninin müxtəlif nahiyələrinə vurmaqla qadını döyüb.
Hadisəni törədən Yəhyanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. O, ifadəsində son bir ay yarım işsiz olduğunu, maddi problemlərin ailədə tez-tez mübahisələr yaratdığını qeyd edib.
Təqsirləndirilən şəxs qeyd edib ki, o, hadisədən əvvəl həyat yoldaşından niyə günorta vaxtı ona 2 manat göndərmədiyini soruşub. O, həmin gün Süsənə mesaj yazaraq siqaret almaq üçün pul istədiyini, həyat yoldaşının isə “pulum yoxdur” cavabı verdiyini bildirib. Süsən evə qayıtdıqdan sonra da mübahisə davam edib. Kişinin ifadəsinə görə, Süsən ona işləməsini və özünün pul qazanmasını deyib. Bu sözlər gərgin müzakirəni daha da gücləndirib.
Əsəbiləşən Yəhya arvadını qonaq otağında əl zərbələri ilə vuraraq baş və bədən nahiyələrinə xəsarət yetirib. Süsən evdən qaçaraq aşağı düşüb və polis əməkdaşları ilə birlikdə mənzilə qayıdıb.
Xətai Rayon Məhkəməsində məlum olub ki, tərəflər barışıb və zərərçəkmiş şikayətindən imtina edib. Bununla bağlı Cinayət Məcəlləsinin 73.2-ci maddəsi tətbiq olunub və Yəhya cinayət məsuliyyətindən azad edilib. Onun barəsində seçilmiş həbs qətimkan tədbiri ləğv olunub və o, məhkəmə zalından azad edilib.
Qeyd edək ki, adlar şərtidir.
