Bu gün iki cəlilabadlı şəhidimiz – Mədət Xankişiyev və Bilal Rzayevin doğum günüdür.
Azərbaycan Ordusunun Xüsusi Təyinatlı Qüvvələrinin giziri olan Mədət Vəkil oğlu Xankişiyev 1998-ci ildə yanvarın 15-i Çünzəli kəndində anadan olub. 2019-cu ildə Quru Qoşunlarının hərbi hissəsinə müraciət edərək MAXE olaraq xidmət etmək istədiyini bildirib. 6 aylıq kurslardan sonra "kiçik gizir" olaraq xidmətə başlayıb. Bir müddətlik xidmətdən sonra o, gizir rütbəsini alıb.
Mədət Xankişiyev 27 sentyabr 2020-ci ildə başlanan Vətən müharibəsi zamanı Füzuli, Cəbrayıl, Xocavənd, Kəlbəcər istiqamətlərində gedən döyüşlərdə iştirak edib və 18 oktyabr tarixində Qubadlının azad olunması zamanı qəhrəmancasına şəhid olub.
Ölümündən sonra "Vətən uğrunda", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Kəlbəcərin azad olunmasına görə" medalları və "Azərbaycan Bayrağı" ordeni ilə təltif edilib.
Bilal Novruz oğlu Rzayev 1997-ci ildə yanvarın 15-i Alar kəndində doğulub. O, Vətən müharibəsi zamanı Cəbrayıl və Qubadlının azadlığı uğrunda gedən döyüşlərdə könüllü olaraq iştirak edib. Qubadlı istiqamətində gedən döyüşlərdə şəhidlik zirvəsinə ucalıb və 2020-ci ildə noyabrın 24-ü Alar kənd qəbiristanlığında dəfn olunub.
B.Rzayev ölümündən sonra “Vətən uğrunda”, "Cəsur döyüşçü", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
