“Azərbaycan Hava Yolları”nın Aktauda qəzaya uğrayan “Embraer 190” təyyarəsinin həlak olan ekipaj üzvləri II Fəxri Xiyabanda dəfn olunacaqlar.
Modern.аz xəbər verir ki, pilotlar İqor Kşnyakin, Aleksandr Kalyaninov və bələdçi Hökümə Əliyevanın dəfninin təntənəli şəkildə təşkil olunacağı bildirilir.
Qəhrəman ekipaj üzvlərinin adlarının əbədiləşdiriləcəyi, onlara şəhid statusunun veriləcəyi və təltif olunacaqları da gözlənilir.
Dekabrın 25-də Bakı-Qroznı reysi ilə uçan “Azərbaycan Hava Yolları”na məxsus “Embraer 190” təyyarəsi qəzaya uğrayıb. Təyyarə Qroznı şəhərinə yaxınlaşarkən Rusiyanın “Pantsir-S1” zenit-raket kompleksi tərəfindən hücuma məruz qalıb. Daha sonra ciddi zədə alan təyyarəmizin Qroznı və Mahaçqala aeroportlarına enməsinə icazə verilməyib.
Qəza nəticəsində, ümumilikdə 67 nəfərdən 38-i həlak olub. Həlak olanlardan 25-i Azərbaycan vətəndaşıdır.
