Hazırda Lənkəran şəhər İcra hakimiyyətinin (ŞİH) büdcəsində sahibsiz itlərlə bağlı vəsait nəzərdə tutulmayıb.
Bunu Lənkəran Şəhər İcra Hakimiyyətindən Cenublu.az-ın sorğusuna cavab olaraq bildirilib.
Xatırladaq ki, ötən həftə Cenublu.az sakinlərdən daxil olan sahibsiz itlərin küçələrdə toplu şəkildə hərəkət etdiyini və sakinlərdən birinin üzərinə itin hücum etdiyini əks etdirən videomateriallar paylaşmışdı. Şikayətçilər bildirilmişdi ki, “itlərin əlindən küçəyə çıxa bilmirik, uşaqlarımızı məktəbə aparmağa qorxuruq”.
Sakinlər bu məsələnin həlli olaraq sığınacaqların açılmasını təklif etmişdilər. Lənkəran İcra Hakimiyyəti isə bildirib ki, bu, yaxın gələcəkdə baş tutmayacaq. Belə ki, Lənkəran rayonunun ərazisində sığınacaqlar yoxdur, o cümlədən şəhər İcra hakimiyyətinin büdcəsində sahibsiz itlərlə bağlı vəsait nəzərdə tutulmadığından sözügedən məsələnin tez bir zamanda həll edilməsi imkan xaricindədir.
İcra Hakimiyyətindən əlavə edilib ki, buna baxmayaraq, qeyd olunan məsələ ŞİH tərəfindən nəzarətə götürülüb və aidiyyəti orqanlarla əlaqə saxlanılaraq yaranmış vəziyyətin həllindən ötrü imkanlar axtarılır.
