Lerikdən olan keçmiş deputat, yazıçı Hüseynbala Mirələmovun oğlu Fuad Mirələmova yeni vəzifə verilib.
Teleqraf.com xəbər verir ki, o, Yasamal Bələdiyyəsinin sədr müavini seçilib.
Bildirilib ki, yanvarın 29-da keçirilən seçkilər nəticəsində formalaşan bələdiyyənin ilk iclası olub. Toplantıda bələdiyyə üzvlərinin siyahısı oxunub və 19 nəfər üzvün iştirakı təsdiqlənib.
Tahir Məmmədov Yasamal Bələdiyyəsinin sədri seçilib. O, bundan əvvəl də həmin vəzifədə çalışıb.
Qeyd edək ki, Fuad Mirələmovun atası Hüseynbala Mirələmov III, IV və V çağırış Milli Məclisin deputatı olub. O, 1992-2021-ci illərdə Yeni Azərbaycan Partiyasının (YAP) Xətai rayon təşkilatının sədri vəzifəsində çalışıb.
Xatırladaq ki, F.Mirələmov əvvəllər daxili işlər orqanlarında çalışıb. O, nazirliyin Baş İstintaq İdarəsinin müstəntiqi olub. Hazırda təqaüddədir. Keçmiş deputatın övladı Yasamal Bələdiyyəsində hakim Yeni Azərbaycan Partiyasını təmsil edən üzvlərdən biridir.
