Ali Məhkəmədə xidməti vəzifələrindən sui-istifadə və vəzifə saxtakarlığında təqsirləndirilən Dadaş Quliyev barəsindəki kassasiya şikayəti üzrə proses başa çatıb.
İttihama görə, o, Ekologiya və Təbii Sərvətlər Nazirliyinin Hirkan Milli Parkının “Seyfidor” meşəbəyliyində mühafizə yegeri və müvəqqəti sahə müfəttişi kimi çalışarkən 2023-cü ilin yayından 2024-cü ilin martınadək vəzifələrini qəsdən icra etməyib. Bu müddətdə müəyyən edilməmiş şəxslərə pul müqabilində parkın müxtəlif dolaylarında ağacların qanunsuz kəsilməsinə şərait yaradılıb. Ümumilikdə 93 ağac kəsilib, 8 aşmış ağac daşınıb, təbiətə 47 128 manat ziyan dəyib. Məhkəmə bu halların milli parkın ekoloji tarazlığına ciddi zərər vurduğunu qeyd edib.
Həmçinin müəyyən edilib ki, Quliyev 2023-cü ilin payızında 27-ci dolayda yaş halda qanunsuz kəsilmiş ağacı aşkar etsə də, cinayəti gizlətmək üçün 15 fevral 2024-cü il tarixli saxta akt tərtib edərək ağacı quru halda kəsilmiş kimi göstərib.
Lənkəran Rayon Məhkəməsi onu Cinayət Məcəlləsinin 308.2 və 313-cü maddələri ilə təqsirli bilərək 3 il 6 ay həbs və 2 il 6 ay müddətinə rəhbər və maddi-məsul vəzifə tutmaq hüququndan məhrumetmə cəzası təyin etmişdi, qərardan verilən apellyasiya şikayəti isə Şirvan Apellyasiya Məhkəməsi tərəfindən təmin edilməmişdi. Daha sonra kassasiya şikayəti verilib. Keçirilən iclasda Şirvan Apellyasiya Məhkəməsinin qərarı müdafiə tərəfinin şikayəti əsasında dəyişdirilib. Quliyevin 3 il 6 ay azadlıqdan məhrumetmə cəzası şərti hesab olunub, ona 3 il sınaq müddəti təyin edilib, həbs qətimkan tədbiri ləğv edilərək azadlığa buraxılıb. Eyni zamanda, vəzifə tutmaq hüququndan məhrumetmə cəzası müstəqil icraya yönləndirilib.
Qeyd edək ki, ad və soyad şərtidir.
