Azərbaycanda pambıqçılıq sahəsində zəngin təcrübəyə malik fermer Lətif Cəfərov dünyasını dəyişib.
Lətif Xanhüseyn oğlu Cəfərov 1936-ci il sentyabrın 9-da Biləsuvar rayonunun Yuxarı Cürəli kəndində anadan olub. 1955-ci ildə Salyan rayon Kənd Təsərrüfatı Texnikumunu bitirib.
1956-ci ildən Biləsuvar rayonu "Azərbaycan" kolxozunda aqronom-entomoloq işləməyə başlayıb.1958-ci ildən 1983-cü ilə kimi həmin kolxozda pambıqçı-briqadir və sürücü-mexanizator işləyib. 1983-cü ildən 1996-cı ilə kimi isə Biləsuvar rayonu "Türkmənistan" kolxozunda pambıqçılıq briqadiri olaraq fəaliyyət göstərib.
1974-cü ildə pambıq yığımında göstərdiyi yüksək nailiyyətə görə ümummilli Lider Heydər Əliyev tərəfindən "QAZ-24" markalı avtomobillə mükafatlandırılıb.
O, "Qırmızı əmək bayrağı" və Əmək veteranı" ordeni, "Əmək" və digər medallarla təltif edilib. 2017-ci ildə isə Azərbaycan Respublikasının Prezidenti İlham Əliyev tərəfindən "Tərəqqi" medalı ilə təltif olunub.
Lətif kişi sonrakı illərdə də ailəsi ilə birlikdə təsərrüfatla məşğul olaraq fermer təsərrüfatını yaradıb. O, 2017-ci ildən Respublika üzrə Fermerlər Şurasının üzvü idi.
