Masallı rayon sakini, 34 yaşlı “Kirvə Vüsal” adı ilə tanınan Vüsal Bayramov ötən ilin 3 sentyabr tarixində Bakı şəhərinin Nizami rayonunuda 27 yaşlı həyat yoldaşı Ayşə Bayramovanı qətlə yetirdiyinə görə azadlıqdan məhrum olunub. Bu haqda məlumatı Cenublu.az bu gün, 4 mart tarixində Qafqazinfo-ya istinadən verir.
V.Bayramov Cinayət Məcəlləsinin 120.1 (Qəsdən adam öldürmə) və 228.4 (Qanunsuz silah saxlama) maddələri ilə ittiham edilib.
Məhkəmədə məlum olub ki, “Kirvə Vüsal” adı ilə tanınan Vüsal 2010-cu ildə Masallıda ailə həyatı qurub və iki övladı dünyaya gəlib. O, 2017-ci ildə Bakıda təsadüfən Ayşəyə məxsus paltar mağazasında olarkən onunla tanış olub və aralarında münasibət yaranıb. Vüsalın həyat yoldaşı ərinin Bakıda başqa qadınla qeyri-rəsmi ər-arvad münasibətində olmasını biləndən sonra ondan Ayşə ilə münasibətə son qoymasını tələb edib. Lakin Vüsal Bayramov Ayşədən ayrılmayacağını deyib və xanımı ondan boşanmaq qərarına gəlib. Onların izdivacı 2019-cu ildə rəsmən bitib.
Bundan sonra Vüsal Bakıda sevgilisinə yeni tikilmiş çoxmərtəbəli binaların birində ev alıb və təmir etdirib. Həmçinin Vüsal 2021-ci ildə Ayşə ilə rəsmi nikaha daxil olub və onların oğlu dünyaya gəlib. Bununla yanaşı, ərinin maddi vəziyyəti yaxşı olduğundan Ayşə mağazasını bağlayıb.
Lakin bundan sonra Vüsalın maddi vəziyyəti pisləşməyə başlayıb. O, qısa vaxtda yeni aldığı evi satmalı olub, özü ata-anası ilə, valideynlərini erkən yaşda itirən Ayşə isə nənəsinin yanında yaşamağa başlayıb. Bundan sonra isə cütlüyün arasında ciddi problemlər yaranıb. Ayşənin nənəsi də tez-tez ondan Vüsala şikayətlər edib. Bu, onların münasibətlərini daha da kəskinləşdirib. Nəhayət, 3 sentyabr 2022-ci ildə Vüsal bıçaqla Ayşənin nənəsinin evinə gedərək onu gözləyib. Gecə saat 23:00 radələrində o, Nizami rayonu, Şərifli küçəsində həyat yoldaşına hücum edərək onu çoxsaylı bıçaq zərbələri ilə qətlə yetirib.
Bakı Ağır Cinayətlər Məhkəməsinin hökmü ilə Vüsal Bayramov 9 il 3 ay müddətinə həbs olunub.
