TƏBİB-in icraçı direktorunun müavini Araz Nəsirov ötən gün bildirib ki, ölkədəki həkimlərin 60-70 faizi son 4-5 ildə Bakıda cəmlənib. O, Azərbaycan regionlarında həkim çatışmazlığı olduğunu qeyd edib.
Həkimlərin regionlardan Bakıya axışması son illər müzakirə olunan ən aktual mövzulardan biridir.
Modern.az-ın Dövlət Statistika Komitəsindən əldə etdiyi məlumatlar da həkimlərin böyük hissəsinin Bakıda olduğunu sübut edir. Komitənin məlumatına görə, 2024-cü ilin əvvəlində Azərbaycanda 33645 həkim olub. Onların 67 faizi - 23 minə yaxını Bakıdadır. Paytaxtda həkimlərin ən çox olduğu rayonlar Nəsimi və Yasamaldır.
Regionlardan ən çox həkimin olduğu bölgələrdən biri Lənkərandır, burada 336 həkim fəaliyyət göstərir.
Bütün Azərbaycanda əhalinin 10 min nəfərinə düşən həkim sayı 33 olduğu halda, Bakıda bu rəqəm 97, Nəsimi rayonunda isə 291-dir.
Bu vəziyyət regionlarda həkim çatışmazlığına səbəb olur. TƏBİB, regionlarda bu çatışmazlığı aradan qaldırmaq üçün bir sıra tədbirlər görür, məsələn, "Karyera portalı" istifadəyə verilib və həkimlərin işə qəbul prosesini optimallaşdırmaq üçün yeniliklər tətbiq olunub.
