Sosial şəbəkələrdə bir qrup hakimi təhqir edən və onları rüşvət almaqda ittiham edən Masallı sakini Hikmət Şükürov (1962-ci il təv.) barədə məhkəmə hökmü elan edilib. O, 5 hakim tərəfindən xüsusi ittiham qaydasında məhkəməyə verilib.
İlkin məlumatda bildirilir ki, Şükürovun narazılığı bacısı oğlu Sabit Əliyev barəsində çıxarılmış xuliqanlıq hökmündən sonra başlayıb. Şirvan Apellyasiya Məhkəməsində hökm elan olunarkən o, zalda hakimləri təhqir edib və polisə müqavimət göstərdiyi üçün 8 sutka inzibati həbs alıb.
Həbsdən sonra isə sosial şəbəkələrdə Masallı Rayon Məhkəməsinin sədri Firdovsi Əliyevi, hakim Elşən Təbrizoviçi, Şirvan Apellyasiya Məhkəməsinin sədri Vəli Abdullayevi, hakim Elçin Xasməmmədovu və Şirvan Şəhər Məhkəməsinin hakimi Ceyhun Mustafayevi, həmçinin onların ailə üzvlərini təhqir etməyə davam edib.
Hakimlər onun cinayət məsuliyyətinə cəlb olunmasını və hər biri üçün 50 min manat mənəvi təzminat təyin edilməsini tələb ediblər.
Binəqədi Rayon Məhkəməsinin hökmü ilə Hikmət Şükürov böhtan və təhqir maddələri ilə 2 il müddətinə azadlıqdan məhrum edilib. Məhkəmə həmçinin hər bir hakimin xeyrinə 10 min manat olmaqla ümumilikdə 50 min manat təzminat ödənilməsi barədə qərar çıxarıb.
