Cəlilabadın Göytəpə şəhərində yerləşən Vüqar Mürsəlov adına 1 nömrəli tam orta məktəb son illərdə biologiya fənni üzrə qazandığı uğurlarla seçilir. 2024–2025-ci tədris ili üzrə qəbul imtahanlarında əldə olunan yüksək nəticələr bu məktəbin kənd rayonları arasında fərqlənməsinə səbəb olub.
“Azərbaycan müəllimi” bu məktəbin biologiya fənni üzrə uğurlarının arxasında duran səbəbləri araşdırmağa çalışıb. Məlum olub ki, bu uğurların arxasında isə fədakar müəllimlər dayanır. 1990-cı ildən bu məktəbdə çalışan, “Azərbaycan Respublikası qabaqcıl təhsil işçisi” döş nişanı ilə təltif olunan Cəmilə Muradova şagirdlərinə sevgiylə yanaşır və bu fənni onlara həyat dərsi kimi təqdim edir: “Fəxr edirəm ki, vaxtilə dərs dediyim şagirdlər bu gün mənim həmkarlarımdır”.
18 ildir biologiya müəllimi olan Əlizamin Əliyev isə uğurun əsas sirrini müəllim-şagird münasibətlərində görür. O, dərslərində interaktiv metodlardan, vizual təqdimatlardan və müasir texnologiyalardan istifadə edərək şagirdləri tibb sahəsinə yönləndirməyə çalışır.
Pərvanə Qafarova isə fərdi yanaşmaya üstünlük verir. O, şagirdlərlə güclü münasibət quraraq onların maraq və qabiliyyətlərinə uyğun yanaşma tətbiq edir, xüsusilə çətin mövzularda – genetika, biokimya və ontogenez – sadə və anlaşılan üsullardan istifadə edir.
Biologiya fənni üzrə fərqlənən məzun Jalə Əkbərova da uğurunda müəllimlərinin dəstəyini əsas amil kimi göstərir: “Müəllimlərimiz bizə yalnız dərsdə yox, dərsdənkənar vaxtlarda da dəstək olurdular. Bu fənn mənim gələcək yolumu müəyyənləşdirdi”.
Bu məktəbdə biologiya sahəsində əldə olunan uğurların təməlində müəllimlərin illərlə göstərdiyi zəhmət, fənnə olan sevgi və şagirdlərə olan məsuliyyət dayanır. Onlar yalnız bilik vermir, həm də yeni nəsil elmi kadrların formalaşmasında mühüm rol oynayırlar.
