Orta Dəhliz üzrə yükdaşımaları 100 % yaşıl enerji ilə təmin ediləcək.
Unikal.az xəbər verir ki, bunu jurnalistlərə açıqlamasında “Azərbaycan Dəmir Yolları” QSC-nin sədri Rövşən Rüstəmov deyib.
"Dekarbonizasiya ilə bağlı bizim Asiya İnkişaf Bankı ilə layihəmiz həyata keçirilir. Bu günlərdə Asiya İnkişaf Bankının missiyası Bakıda idi. Dekarbonizasiya istiqamətində dəmir yollarına əlavə qrant ayırılmasına dair ilkin olaraq razılıqlarını bildiriblər. Bununla da biz demək olar ki, Orta Dəhliz üzrə yükləri 100 % yaşıl enerji ilə daşınmasını təmin etmiş olacağıq", - deyə R.Rüstəmov bildirib.
O qeyd edib ki, "Şimal-Cənub" layihəsi ilə bağlı Rusiya və İran dəmir yolları ilə görüşlər olub:
"Keçən ay Daşkənddə Rusiya dəmir yolları qurumunun rəhbəri ilə görüşəndə də bu məsələ ətrafında müzakirələr apardıq. Növbəti il yalnız Şimal-Cənub deyil, həm də Cənub-Şimal istiqamətində də yük daşımaları planlaşdırılıb. Gələn həftə İran dəmir yollarının rəhbəri ilə görüşümüz gözlənilir. Ötən ay İranda olarkən qəbul etdiyimiz fəaliyyət planına uyğun olaraq, Astara terminalında işlərin yekunlaşdırılması üzərində çalışırıq. Fəaliyyət planına görə, gələn il artıq Astara terminalı tam yekunlaşacaq və bu istiqamətdə bizim yükaşırma qabiliyyətimiz 4 milyon tona çatmış olacaq".
Şimal-Cənub Beynəlxalq Nəqliyyat Dəhlizi üzrə əhəmiyyətli dərəcədə artmaqda olan yükaşırmaların operativ şəkildə həyata keçirilməsini təmin etmək məqsədilə 2024-cü ilin may ayından Azərbaycan ərazisində Astara Terminalı da fəaliyyətə başlayıb.
Terminalda aparılmış rekonstruksiya işləri çərçivəsində yük anbarı müasir standartlara uyğun olaraq təmir edilib, əməliyyatların təhlükəsiz və dayanıqlı həyata keçirilməsi üçün zəruri texnikalarla təchiz olunub.
Gömrük nəzarəti altında terminala daxil olan yüklər aşırılaraq təyinatı üzrə sürətli şəkildə çıxarılır.
