Musiqi dünyasında istedadı və peşəkarlığı ilə seçilən şəxslərdən biri də Rail Yusubovdur. O, həm mahir qarmon ifaçısı, həm də təcrübəli musiqi müəllimi kimi tanınır. Bununla yanaşı, fortepiano alətlərinin sazlanması və təmiri sahəsi üzrə də mütəxəssisdir. Hazırda Rail Yusubov Azərbaycanın cənub bölgəsində bu sahə ilə məşğul olan yeganə ustadır.
Azertag.az xəbər verir ki, Rail Yusubov uzun illərdir musiqi müəllimi kimi çalışır və gənc istedadların yetişməsinə töhfə verir. Onun tələbələri arasında müxtəlif musiqi müsabiqələrində uğur qazananlar da var. Xüsusilə qarmon ifaçılığı sahəsində onun pedaqoji bacarıqları yüksək qiymətləndirilir: "Musiqi mənim üçün sadəcə bir sənət deyil, o, ruhumun bir parçasıdır. Hər tələbəmin uğuru mənim üçün ən böyük mükafatdır. Tələbələrimə öyrətməyə çalışıram ki, musiqi təkcə notdan ibarət deyil, o, həm də bir həyat tərzidir".
Musiqi alətlərinin sazlanması xüsusi dəqiqlik və incəlik tələb edir. Rail Yusubov bu sahədə öz bilik və bacarıqlarını inkişaf etdirərək, cənub bölgəsinin yeganə fortepiano ustası kimi tanınır. Belə demək mümkündürsə, o, kökdən düşmüş, istifadəyə yararsız fortepianolara yeni həyat verir.
"Hər fortepiano fərqli tarixə malikdir. Onları yenidən işlək vəziyyətə gətirmək mənim üçün böyük bir sevincdir. Hər sazladığım fortepianoya yeni həyat bəxş etdiyimi düşünürəm. Həmin alətə yenidən toxunan barmaqların duyduğu hisslər mənim üçün ən dəyərli mükafatdır. Bir fortepianonun sazlanması təkcə texniki proses deyil. Hər fortepianonun özünəməxsusluğu var və onunla işləyərkən aləti duymaq lazımdır" , - deyə Rail müəllim bildirir.
Rail Yusubov musiqiyə sevgisini yalnız ifaçılıq və pedaqoji fəaliyyətlə deyil, həm də musiqi alətlərinə qayğı göstərməklə nümayiş etdirir. O, gələcəkdə daha çox insanın bu sahədə bilik qazanmasına kömək etməyi və fortepiano ustalığını gənc nəslə ötürməyi planlaşdırır.
Həmsöhbətimiz gələcək planlarından danışaraq deyir ki, Azərbaycanda bu sahəyə marağın artmasını, yeni ustaların yetişməsini arzulayır: “Mən öz biliklərimi paylaşmağa və bu ənənəni yaşatmağa hazıram. Çünki musiqi yalnız ifa etməklə deyil, həm də alətlərə qayğı göstərməkdir".
