Ölkə ərazisində müşahidə olunan soyuq və şaxtalı hava şəraiti cənub bölgəsində sitrus ağaclarına mənfi təsir edib. Xüsusilə Lənkəran, Astara və Masallı rayonlarında fermerlər məhsuldarlığın azalmasının qarşısını almaq üçün müxtəlif qoruyucu tədbirlər həyata keçirirlər.
Cenublu.az xəbər verir ki, sitrus bağlarını şaxtadan qorumaq üçün ənənəvi üsullarla yanaşı müasir texnologiyalar da tətbiq olunur.
Bəzi təsərrüfat sahibləri bağlarda kiçik ocaqlar qalayaraq temperaturun yüksəldilməsinə çalışırlar. Bəzən güclü şaxtalar zamanı bu tədbirlər yetərli olmur və ağacların zərər görmə riski artır. Fermer Ramiz Hüseynov bildirir ki, ağacları şaxtadan qorumaq üçün ənənəvi üsullardan istifadə edirlər. Onun sözlərinə görə, əsas qoruyucu tədbirlərdən biri ağacların polietilen örtüklərlə bağlanmasıdır. Bundan əlavə, torpağın nəm saxlanılması və süni istilik mənbələrinin istifadəsi də şaxtanın təsirini azaltmağa kömək edir.
Lənkəran rayonunun Separadi kəndində 150 hektar sahədə salınan sitrus bağında iki ildən artıqdır ki, ağaclar “pərvanələr” vasitəsilə qorunur. Bu “pərvanələr” qış aylarında istənilən havada temperaturu tənzimləyir və beləliklə, meyvələri və ağacları şaxtadan qoruyur. Yaxın illərdə isə bu müasir avadanlıqlardan digər ətraf ərazilərdə də quraşdırılması planlaşdırılır.
Qeyd edək ki, şaxtalı hava şəraitində sitrus bağlarının qorunması üçün vaxtında tədbirlər görülməzsə, məhsuldarlıqda ciddi azalmalar müşahidə oluna bilər. Hazırda fermerlər havanın temperaturunu nəzarətdə saxlayaraq sitrus ağaclarının donvurmadan qorumaq üçün işləri davam etdirirlər.
