Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində erməni snayperinin açdığı atəş nəticəsində yaralanan hərbi qulluqçu Pərviz Xəlilzadə Lənkəran Dövlət Universitetinin məzunudur. Bu haqda məlumatı Cenublu.az bu gün, 13 fevral tarixində verir.
Belə ki, 23 yaşlı Pərviz ötən il LDU-nun Tarix-coğrafiya müəllimliyi ixtisasını bitirib.
Aldığı xəsarət nəticəsində o, Respublika Neyrocərrahiyyə Xəstəxanasına DSX-nin hərbi təcili tibbi yardım maşını vasitəsilə gətirilib və dərhal əməliyyat olunub. Ermənistanın təxribatı nəticəsində yaralanan hərbi qulluqçu o an barədə bunları deyib: “Sərhəd döyüş məntəqəmizdə iki nəfərlə vəzifəmizi yerinə yetirirdik. Qarşıdakı düşmən postlarının müşahidəsini aparırdıq. Bu zaman tək bir atəş səsi eşitdim. Həmin an huşumu itirdim”.
Qeyd edək ki, təxribata cavab olaraq Dövlət Sərhəd Xidməti tərəfindən “qisas əməliyyatı” keçirilib.
