2023-ci il fevralın 1-dən Azərbaycanda minimum aylıq əmək pensiyasının məbləği 280 manata çatdırılıb, yaşa görə sosial müavinətin məbləği isə 220 manat müəyyən edilib.
“Hesablama Palatasının Azərbaycan Respublikasının 2025-ci il dövlət büdcəsi haqqında” qanun layihəsində minimum pensiya məbləğinin 280 manat olacağı qeyd olunub.
Bildirilir ki, 2025-ci il üzrə proqnozlara əsasən, minimum pensiya məbləğinin minimum əməkhaqqı məbləğinə (400 manat) nisbətinin 70 faiz olacağı nəzərdə tutulur.
Bəs görəsən, əmək pensiyası və sosial müavinətlər artırıla bilərmi?
Mövzu ilə bağlı Bakuplus.az-a açıqlama verən iqtisadçı Xalid Kərimlinin sözlərinə görə, pensiyalar orta aylıq əmək haqqındakı artıma əsasən dəyişir:
“Azərbaycanda pensiya qanunvericiliyinə görə, hər il dövlətin büdcə müzakirələrindən asılı olmayaraq pensiyalar avtomatik indeksləşdirilir.
2025-ci il yanvarın 1-dən 2024-cü ildə işləyən şəxslərin aylıq orta əmək haqqında artım faizinə uyğun pensiyaları arta bilər. Yəni 2024-cü ildə işləyən şəxslərin orta aylıq maaşı nə qədər qalxıbsa, faiz pensiyaları da o qədər artır. Bu, avtomatik rejimdədir. Hələlik 2024-cü ildə işçilərin maaşı 8 faiz artıb. İlin axırına dəqiq bilinəcək. Bu da pensiyaların indeksləşməsinə təsir göstərəcək”.
İqtisadçı ekspert Eyyub Kərimli qeyd edib ki, pensiya və sosial müavinətlər 10-15 faiz arta bilər:
“Hər il inflyasiya və orta aylıq əmək haqqının artımına görə müəyyən pensiya və müavinətlərdə indeksasiyalar aparılır. Bu il də davam edəcək. Orta aylıq əmək haqqında artım indeksasiya edilə bilər. Hazırda orta aylıq əmək haqqındakı artım 11-12 faiz təşkil edir. Büdcə gəlirlərimiz imkan versə, düşünürəm ki, sosial müavinətlər və pensiyalar 10-15 faiz artırıla bilər”.
Nəzrin Vahid
