Cəlilabadlı kişi tanışının külli miqdarda pulunu mənimsəyib.
Cenublu.az-ın əldə etdiyi məlumata görə, hadisənin istintaqı Sumqayıt Ağır Cinayətlər Məhkəməsinin hakimi Aynur Rzayevin sədrliyi ilə keçirilib.
Belə ki, Cavid Qədirov (ad şərtidir) 1981-ci ildə Cəlilabad rayonunda anadan olub. O, dostu Səlim Qasımovun (ad şərtidir) etibarından sui-istifadə edib. BƏƏ-dən 6 ədəd “HYUNDAİ” markalı avtobusu alıb, Bakıya gətirdikdən sonra icarəyə verərək yaxşı qazanc əldə edəcəklərini vəd edib. Bu barədə həqiqətə uyğun olmayan məlumatlar verməklə Səlim Qasımovdan 90 min manat pul mənimsəyib.
Məhkəmə istintaqı zamanı təqsirləndirilən Cavid Qədirov ittiham üzrə özünü təqsirsiz bilib:
“Səlimlə birlikdə Dubaydan avtobus alıb, Bakıda bərabər işlədəcəkdik. Lakin yolda gətirildiyi zaman aldadıldım. Əvvəldən də maşın alqı-satqısı ilə məşğul olmuşam. Dubaydan maşın alıb Azərbaycanda satmışam. Səlim Qasımovu hadisədən 2 ay əvvəl hazırda Almaniyada yaşayan Zahid adlı şəxs vasitəsi ilə tanımışam. Səlim avtobus almaq üçün Zahidin vasitəsilə evini girova qoyub. Verilən 90.000 manat pulu batırmışam və pulu geri verməyə hazıram. Evim müqaviləli olduğu üçün girov qoymaq olmurdu. Səlim təklif etdi ki, onun evini girov qoyub pul götürək”.
Zərərçəkmiş Səlim Qasımov məhkəmədəki ifadəsində göstərib ki, zəhmətkeş ailədə böyüyüb:
“Öz qazancım ilə ailəmi saxlayıram. Pulu Cavidə verdikdən sonra ara-sıra danışmışıq. O, hər dəfə danışanda maşınların artıq yolda olduğunu, narahat olmağa heç bir əsas olmadığını, evin sənədlərini geri qaytaracağını bildirib. Bir müddətdən sonra Cavid avtobusların yolda qaldığını, yolların bağlandığını, Dubaydan maşınları göndərə bilməyəcəyini dedi. 3 aydan sonra evimin əldən getdiyini, Cavidin mənə yalan danışdığını başa düşdüm. Ona məhkəməyə gedəcəyimi deyəndə Aybəniz adlı birini tapıb vəkil olduğunu dedi. Məhkəməni 2 il müddətində özünü vəkil kimi təqdim edən, Cavidin tanışı olan Aybəniz adlı qadın apardı.
Sonradan 3 nəfər şəxsin razılaşdığı və Aybənizin də mənim adımdan “evin filankəsin adına keçirilməsinə etirazım yoxdur” məzmunlu ərizə yazdığı məlum olub. Bunu öyrəndikdən sonra yeni vəkillə müqavilə bağladım, vəkil Ülvi İsmayılov mənə aldadıldığımı, evin artıq əldən getdiyini dedi. Həmin günü yeni vəkil tutduğum barədə məlumat verdikdən sonra Aybəniz təhqiredici ifadələr işlətməyə başladı. Cavid məni çox pis vəziyyətə saldı”.
Sonda məhkəmə Cavid Qədirovu ittiham üzrə təqsirli bilib. O, məhkəmənin qərarı ilə 5 il müddətində azadlıqdan məhrum edilib.
Fidan İlqar
