Dirçəliş Günü Azərbaycanın tarixi və milli kimliyində xüsusi yer tutan, xalqın milli birliyi və müstəqillik uğrunda mübarizəsini təcəssüm etdirən mühüm bayramlardan biridir. Bu gün, 1988-ci il noyabrın 17-də Azərbaycan xalqının sovet rejiminə qarşı kütləvi etirazlarının başlandığı gün kimi qeyd edilir. Sözügedən hadisələr Azərbaycan tarixində yeni bir mərhələnin başlanğıcı, milli azadlıq hərəkatının əsas təməllərindən biri olub.
1980-ci illərin sonları Sovet İttifaqının zəiflədiyi və totalitar rejimə qarşı xalq hərəkatlarının artdığı bir dövr idi. Azərbaycanın siyasi, iqtisadi və mədəni suverenliyini məhdudlaşdıran Sovet rejimi ölkədə dərin narazılıqlar yaratmışdı. Xüsusilə Ermənistanın Qarabağ bölgəsinə ərazi iddiaları və Moskvanın buna dəstək verməsi Azərbaycan xalqını ayağa qaldırdı.
1988-ci il noyabrın 17-də Bakıdakı Azadlıq Meydanında başlayan kütləvi mitinqlər ölkənin hər yerində geniş vüsət aldı. Bu mitinqlər yalnız Qarabağ məsələsinə etiraz deyildi; xalq öz milli kimliyini bərpa etmək, azadlıq və müstəqillik arzularını ifadə edirdi. Həmin hadisələr Azərbaycanın gələcəkdə müstəqillik qazanması yolunda mühüm addım oldu.
1992-ci ildən 17 noyabr Milli Dirçəliş Günü kimi qeyd olunur.
