Lənkəranda el arasında yapon qozu kimi məşhurlaşan pekan qozunun yığımı başlanılıb. Bu haqda məlumatı Cenublu.az bu gün, 9 dekabr tarixində ARB Cenub-a istinadən verir.
Təsərrüfatçl Əlibala Cavadov bildirir ki, hər il olduğu kimi, bu ildə qoz yığımı başlayıb:
“Noyabrın əvvəlində yapon qozu yetişir. 7-8 ağacımız var. Keçən il qoz, demək olar ki, yox idi, bu il isə ağaclar yaxşı bar gətirib. Yığıma artıq başlamışıq, məhsul boldur. Artıq olanda satırıq, bazara çıxarmırıq. 4 il olur, 5 il olur, evdə yeyirik, gedir”.
Pekan qozunun vətəni Şimali Amerika hesab olunur. İqlimə uyğunlaşması nəzərə alınaraq bu bitki ilk dəfə 1930-cu illərdə Lənkəran rayonuna gətirilir. Təcrübə məqsədilə əkilən bu bitki sonradan sakinlərin sevimli ağacına çevrilir. Pekan qozu təbii və faydalı xüsusiyyətlərinə görə yerli əhali üçün ən dadlı çərəz hesab olunur.
Mütəxəssis Elşad Höccətov bildirir ki, yapon qozu 1927-1928-ci illərdə Lənkərana gətirilib:
“Yapon qozu Lənkəran rayonunun bir neçə kəndində – Sütəmurdov, Girdəni, Gərmətük qəsəbəsi, bir də bizim elmi mərkəzdə ilk dəfə sınamaq məqsədilə əkilib və yüksək səviyyədə, yüksək müvəfəqiyyətlə həm artıb, həm də effektli dərəcədə məhsuldarlığa malik olub. 5-7 ildən sonra məhsul əldə olunur, 15-20 ildən sonra artıq ildə 20-30 kq məhsul verə bilər”.
Bu ağac hər bir hava şəraitinə dözümlüdür. Heç bir qulluq tələb etmədiyindən təsərrüfatçılar üçün sərfəli hesab olunur. Nəm və isti hava meyvələrin inkişafı üçün ideal şərait yaradır. Lənkəranın iqlimi də bu tələblərə tam cavab verir.
Bu qida beyin və damar sistemini xəstəliklərdən qoruyur. Xərçəng hüceyrələrinin qarşısını alan maddələr pekan qozunun tərkibində çoxdur. Sərfəli və faydalı xüsusiyyətlərinə görə kənd sakinləri öz təsərrüfatlarında bu ağacların sayını daha da artırmaq niyyətindədirlər.
[caption id="attachment_50110" align="alignnone" width="336"]
Foto ARB Cənub[/caption]
