Peşə Təhsili üzrə Dövlət Agentliyinə direktor təyin olunub. Bu haqda məlumatı Cenublu.az bu gün, 3 oktyabr tarixində verir.
Elm və təhsil naziri Emin Əmrullayev sözügedən vəzifəyə Ceyhun Kərəmovu təyin edib. Təyinatdan öncə Ceyhun Kərəmov Peşə Təhsili üzrə Dövlət Agentliyinin direktoru vəzifəsini müvəqqəti icra edirdi. O, əslən Lənkəran rayonunun Kərgəlan kəndindəndir.
O, enerji, davamlı inkişaf, hökumət və qeyri-hökumət sektorlarında 20 ildən çox təcrübəyə malikdir. Ceyhun Kərəmov 2006-cı ildən BP şirkətinin Azərbaycan-Gürcüstan-Türkiyə Regionunda çalışıb və İşçi Heyətinin Milliləşdirilməsi və Miqrasiya Məsələləri üzrə menecer vəzifəsini icra edib. Bundan əvvəl o, BMT İnkişaf Proqramı, UNİTAR və USAİD tərəfindən maliyyələşdirilən layihələrdə çalışıb. O, dörd il ABŞ Təhsilli Azərbaycanlı Məzunlar Assosiasiyasına sədrlik edib və eyni zamanda ENAM (Amerika Məzunlar Assosiasiyalarının Avropa Əlaqələndirmə Şəbəkəsi) təsisçilərindən biri olub. Ceyhun Kərəmov İNSEAD Biznes Məktəbini Qlobal Biznes İdarəetməsi Proqramını (2018), ABŞ-nin Corciya Ştatı Universitetinin İctimai İdarəetmə (2006) və Azərbaycan Dillər Universitetinin Avropaşünaslıq üzrə bakalavr (2003) proqramını bitirib. Corc Vaşinqton Universitetinin Layihə İdarəetməsi üzrə magistr sertifikatını əldə edib. Ceyhun Kərəmov 2016-cı ildə PMP sertifikasiyasını keçib.
