Bu gün lənkəranlı şəhid mayor Emil Əsgərli və cəlilabadlı şəhid Səyyad Ağahüseynlinin anadan olduqları gündür.
Emil Əlihüseyn oğlu Əsgərli 1982-ci ildə yanvarın 30-u Lənkəran şəhərində anadan olub. 1996-1999-cu illərdə Cəmşid Naxçıvanski adına Hərbi Liseydə, 1999-2003-cü illərdə isə Heydər Əliyev adına Ali Hərbi Məktəbdə təhsil alıb.
Nümunəvi xidmətinə görə dəfələrlə diplom və medallarla təltif olunub. O, 2013-cü ildə mayor hərbi rütbəsi ilə təltif edilib.
Emil Əsgərli 15 may 2014-cü il tarixində Beyləqan rayonunun “N” saylı hərbi hissəsində ərazini yoxladığı zaman şəhid olub.
Səyyad Əliyar oğlu Ağahüseynli 2002-ci ildə yanvarın 20-i Qarazəncir kəndində anadan olub. Orta təhsilini başa vurduqdan sonra hərbi xidmətə yollanıb.
Vətən müharibəsi zamanı qəhrəmanlıqla vuruşan Səyyad düşmənin xeyli sayda canlı qüvvəsini və hərbi texnikasını məhv edib. O, bir sıra çətin əməliyyatlarda şəxsi cəsarətinə görə dəfələrlə seçilib. Buna görə də əsgər yoldaşları arasında böyük hörmət qazanıb.
20 oktyabr 2020-ci ildə Qubadlı istiqamətində gedən döyüşlərdə tapşırıq yerinə yetirdiyi zaman şəhidlik zirvəsinə ucalıb. 21 oktyabr tarixində Qarazəncir kəndində torpağa tapşırılıb.
Ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
