Vergi Məcəlləsinə dəyişikliklər çərçivəsində tətbiq edilən yeniliklərdən biri də bəzi peşələrlə məşğul olan şəxslər üçün sabit vergi dərəcəsinin artırılmasıdır.
Fed.аz xəbər verir ki, Məcəlləyə edilən dəyişikliklərə əsasən, toylarda, şənliklərdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik (klounluq) və digər oxşar fəaliyyət, fərdi foto, audio-video xidmətləri sahəsində fəaliyyət, çəkməçi, pinəçi, saat, televizor, soyuducu və digər məişət cihazlarının təmiri, fərdi yaşayış evlərində və mənzillərdə ev qulluqçusu, xəstələrə, qocalara və uşaqlara qulluq xidməti, dayə, fərdi sürücülük, ev təsərrüfatında təmizlik, bağban, aşpaz, gözətçi və iaşə obyektlərində müştərilərə xidmət göstərən fiziki şəxslər (ofisiant), nəqqaşlıq emalatxanalarının fəaliyyəti, fərdi qaydada bərbər və dərzi fəaliyyəti ilə məşğul olan şəxslər üçün vergilər artırılır.
Belə ki, toylarda, şənliklərdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik və digər oxşar fəaliyyətə görə vergilər minimum aylıq əməkhaqqının 5 faizindən (hazırda 20 manatdır) minimum əmək haqqının 8 faizinə – 32 manata qaldırılır.
Fərdi foto, audio-video xidmətləri (fotostudiyalar istisna olmaqla) sahəsində fəaliyyət – minimum aylıq əməkhaqqının 5 faizindən (hazırda 20 manatdır), minimum əmək haqqının 8 faizinə – 32 manata qaldırılır.
Çəkməçi, pinəçi, bərbər, dərzi fəaliyyəti, saat, televizor, soyuducu və digər məişət cihazlarının təmiri, nəqqaşlıq emalatxanalarının fəaliyyəti, fərdi yaşayış evlərində və mənzillərdə ev qulluqçusu, xəstələrə, qocalara və uşaqlara qulluq xidməti, dayə, fərdi sürücülük, ev təsərrüfatında təmizlik, bağban, aşpaz, gözətçi və iaşə obyektlərində müştərilərə xidmət göstərən (ofisiant), fərdi baytarlıq xidməti praktikası ilə məşğul olan fiziki şəxslər üçün vergi minimum aylıq əməkhaqqının 3 faizindən (hazırda 12 manatdır), minimum əmək haqqının 5 faizinə – 20 manata qaldırılır.
Yeri gəlmişkən, siyahıdan görünür ki, fərdi baytarlar da gələn ildən ilk dəfə vergiyə cəlb olunacaqlar – ayda 20 manat.
