Cənub rayonlarında 27 Sentyabr - Anım Günü ilə bağlı silsilə tədbirlər keçirilib. Bu haqda məlumatı Cenublu.az verir.
Lənkəran ŞİH-nin başçısı Taleh Qaraşov, icra aparatının kollektivi, hüquq-mühafizə orqanlarının rəhbərləri, şəhid ailələrinin üzvləri, qazilər, müharibə veteranları və rayon ictimaiyyəti Şəhidlər Abidə Kompleksini ziyarət ediblər. Daha sonra Şəhidlər xiyabanı küçəsində və ətraf ərazilərdə ağacəkmə aksiyası keçirilib, 150-yə yaxın ağac əkilib. Tədbirin iştirakçıları lənkəranlı gənclərin rəsmlərindən ibarət “Şəhidlər ölməz” adlı sərgi ilə tanış olublar. Sonda şəhid övladlarının və məktəblilərin iştirakı ilə bədii kompozisiya təqdim olunub.
Masallıda keçirilən tədbirdə Rayon İcra Hakimiyyətinin başçısı Araz Əhmədov, Millət vəkili Məşhur Məmmədov, hüquq-mühafizə orqanlarının rəhbərləri, şəhid ailələri, qazilər, rayon ictimaiyyəti və media nümayəndələri iştirak ediblər.
Tədbir iştirakçıları “Qəhrəmanlar parkı” abidə kompleksini ziyarət edib, abidə qarşısına gül dəstələri düzüblər. Daha sonra Hişkədərə kəndində şəhid leytenant Zaur Hüseynovun adına ucaldılan bulağın açılışında olublar və leytenantın vəfatının ikinci ildönümü ilə əlaqədar verilən ehsan süfrəsində iştirak ediblər.
Cəlilabadda keçirilən tədbirdə rayon İcra Hakimiyyətinin başçısı Rafiq Cəlilov, şəhid ailələri, qazilər, müharibə iştirakçıları, RİH-nin məsul şəxsləri, hüquq- mühafizə orqanlarının, idarə, müəssisə, təşkilatların rəhbərləri və din xadimləri iştirak ediblər. Tədbir iştirakçıları Birinci Qarabağ müharibəsində və Vətən müharibəsində şəhidlik zirvəsinə ucalan oğullarımızın xatirəsinə salınmış Şəhidlər xiyabanını və şəhidlərin xatirəsinə ucaldılmış abidə kompleksini ziyarət ediblər. Daha sonra Vətən müharibəsi şəhidlərinin əziz xatirəsinə ehtiram əlaməti olaraq Heydər Əliyev prospektində ağacəkmə aksiyasında iştirak ediblər.
Astara rayon İcra Hakimiyyətinin başçısı şəhərin mərkəzində yerləşən Şəhidlərin Xatirə Kompleksini ziyarət edib, xatirə lövhəsinin önünə əklil qoyub. Sonra icra başçısı Qəzənfər Ağayev şəhid ailələri, qazilər və müharibə iştirakçıları ilə görüşərək Vətən müharibəsində qazandığımız qələbədən danışıb.
