Azərbaycanın cənub bölgəsində xanımlar üçün layihə təqdim olunacaq. Bu haqda məlumatı Cenublu.az bu gün, 2 oktyabr tarixində verir.
“He for She/Women in STEM” layihəsinin məqsədi STEM, İKT, innovasiya və texnologiya sahələrində bilik və bacarıqlarını inkişaf etdirmək istəyən və karyerasını bu sahədə qurmağı planlaşdıran 15-35 yaşlı gənc xanımlara dəstək olmaqdır.
3-4 ay davam edəcək layihə ərzində iştirakçılara gələcəyin peşə və bacarıqları və İT ilə əlaqəli sahələrdə təlimlər keçiriləcək və bu sahədə xanımlara karyera planlaması və özlərinin peşəkar reallaşması istiqamətində ekspertlər tərəfindən dəstək olunacaq. Eyni zamanda bu prosesdə atalarınızın və ya qardaşlarınızın da prosesə cəlbi ilə onlara STEM-in gətirdiyi imkanlarla bağlı interaktiv təlimlər və “kouç”luq sessiyaları təşkil ediləcək.
Kimlər müraciət edə bilər:
- Azərbaycanın cənub bölgəsində (Lənkəran, Astara, Masallı, Lerik, Cəlilabad, Biləsuvar) yaşayan 15-35 yaşlı xanımlar;
- STEM və IT sahələri üzrə həvəsi olan, bu sahədə karyera qurmaq istəyənlər;
- Özlərini potensiallarına uyğun peşəkar səviyyədə reallaşdırmaq istəyən xanımlar;
- İnkişaf proqramında seçilmiş namizədlər və onların valideynləri (ataları və ya qardaşları).
İştirak etmək istəyən xanımlar linkə keçid edərək qeydiyyat formunu doldurmalıdırlar. Son qeydiyyat tarixi: 25 oktyabr.
Qeyd edək ki, layihə Birləşmiş Millətlər Təşkilatının İnkişaf Proqramının Azərbaycan Ofisinin dəstəyi ilə həyata keçirilir.
