Cəlilabaddan olan Əli İlqar oğlu Yarıyev Naxçıvan Dövlət Universiteti Tələbə Elmi Cəmiyyətinin Mətbuat katibi təyin olunub.
Naxçıvan Dövlət Universitetinin Jurnalistika ixtisası tələbəsi Əli Yarıyev 18 fevral 2004-cü il tarixində Cəlilabad rayonunda anadan olub. 2010-cu ildə Məzahir Pənahov adına tam orta məktəbin I sinfinə daxil olub. 2021-ci ildə həmin məktəbin XI sinfini yüksək göstəricilərlə bitirib və həmin ildə Naxçıvan Dövlət Universitetinin “Jurnalistika” ixtisasına qəbul olub.
Qəbul olduğu ildən Naxçıvan Dövlət Universiteti Tarix-filologiya fakültəsinin Tələbə Gənclər Təşkilatı sədrinin müavini, daha sonra isə həmin fakültənin Tələbə Həmkarlar İttifaqı Komitəsi sədri olaraq fəaliyyət göstərib.
O, 2023-ci ilin fevral ayından Naxçıvan Muxtar Respublikası Dövlət Televiziya və Radio Verilişləri Qapalı Səhmdar Cəmiyyətində aparıcı-redaktor olaraq fəaliyyət göstərir. Hazırda Xəbərlər proqramı, səhər proqramı və tanınmış “Axşam-axşam” televiziya proqramının aparıcısıdır.
2023-2024-cü illər ərzində Naxçıvan Dövlət Universitetinin Enactus komandasının əsas spikeri kimi iki dəfə ölkə çempionatında iştirak edib, 2024-cü ildə Qazaxıstan Respublikasında keçirilən Enactus Dünya Çempionatında ölkəmizi təmsil edib.
