Cəlilabad rayonunun Uzuntəpə kəndində iribuynuzlu heyvanda quduzluq aşkarlanıb. Hadisə həm kənd sakinləri arasında narahatlıq yaradıb, həm də aidiyyəti qurumların təcili müdaxiləsini zəruri edib.
Təsərrüfat sahibi Mirhüseyn Hüseynovun Cenublu.az-a verdiyi məlumata görə, heyvan aqressivləşdikdən və yemdən kəsildikdən sonra baytar həkimə müraciət edilib. İlkin ehtimallar zəhərlənmə üzərində olsa da, sonrakı müayinələrdə quduzluq xəstəliyinə uyğun simptomlar müəyyənləşdirilib. Daha sonra heyvan tələf olub.
Ailədə heyvanla təmasda olan 4 nəfər Cəlilabad Mərkəzi Xəstəxanasına müraciət edərək quduzluq əleyhinə peyvənd olunublar.
Kənd sakini bildirib ki, aidiyyəti qurumlar hadisəyə müdaxilə etməli, heyvanın cəsədini basdıraraq və ya yandıraraq zərərsizləşdirməlidirlər.
Yerli Baytarlıq İdarəsindən verilən məlumata görə, məsələ barədə Qida Təhlükəsizliyi Agentliyinə (AQTA) məlumat ötürülüb. Agentlik əməkdaşları heyvanın cəsədindən laborator analiz üçün nümunələr götürəcək və daha sonra həmin nümunələr aidiyyəti üzrə zərərsizləşdiriləcək.
View this post on Instagram
