Cəlilabad rayon İcra Hakimiyyətinin başçısı Rafiq Cəlilov Axtaxana, Darılıq və Ağbulaq kəndlərində olub. Bu haqda bu gün, 3 mart tarixində Cenublu.az Cəlilabad RİH-yə istinadən xəbər verir.
Rafiq Cəlilov icra aparatının məsul şəxsləri ilə birlikdə rayonun ucqar dağ kəndlərindən olan Axtaxana, Darılıq və Ağbulaqda olub, kənd sakinlərinin qayğıları və problemləri ilə maraqlanıb.
Kənd sakinləri kəndarası yolların əsaslı təmir olunması, Darılıq və Ağbulaq kəndlərində modul tipli məktəblərin tikilməsi, kəndlərdə tibb və ya feldşer-mama məntəqəsinin açılması, elektrik təsərrüfatının yenilənməsi və digər sosial məsələlərlə bağlı təkliflər səsləndiriblər.
Vətəndaşlarla səmini söhbət edən icra başçısı onları narahat edən məsələləri dinləyib və ucqar dağ kəndlərində əhalinin həyat səviyyəsinin yüksəldilməsi istiqamətində müvafiq köməkliklərin ediləcəyini sakinlərin diqqətinə çatdırıb.
