Cəlilabad rayonunda üç gündür yağan güclü qar kənd təsərrüfatına ciddi ziyan vurub.
Report.az xəbər verir ki, bu barədə bir qrup fermer məlumat verib.
Onların sözlərinə görə, son günlərdə yağan aramsız qar və şaxtalı hava şəraiti rayondakı əkin sahələrinə, meyvə bağlarına və istixana təsərrüfatlarına ciddi ziyan yetirib.
Fermerlər bildiriblər ki, son illərdə rayonda istixana təsərrüfatına üstünlük verilir. Lakin son yağan qar və havaların sərt keçməsi bu sahəyə də mənfi təsir göstərir. Belə ki, yağan qarın ağırlığı istixana konstruksiyalarına təsir edərək, onların dağılmasına və nəticədə bitkilərin məhvinə səbəb olur.
Həmçinin fermerlər qeyd ediblər ki, şaxtanın təsiri nəticəsində təzə pöhrələnmiş kartof kollarının donması gözlənilir, bu da məhsuldarlığa təsirsiz ötüşməyəcək.
Kənd təsərrüfatı mütəxəssisi İmran Babayevin sözlərinə görə, hazırda yağan qarın kənd təsərrüfatı üçün su balansının yaranmasında böyük köməyi olacaq. Bununla belə, o, şaxtalı hava şəraitində bəzi kənd təsərrüfatı məhsullarının qorunmasının vacibliyini vurğulayıb:
"Çiyələk sahələrində demək olar ki, məhsul istixana şəraitində yetişdirilir. Bu istixanaların da əksəriyyəti kustar üsulla düzəldilib. Nəticədə yağan qarın ağırlığına dözməyən istixanalar çökür və dağılır. Bu vəziyyət fermerlərin zərər çəkməsinə səbəb olur. Fermerlər həmçinin yazlıq əkinləri çox erkən apardıqları üçün hava şəraiti kəskin dəyişdikdə, təsərrüfatlar ciddi ziyan dəyir".
