Cəlilabad rayonunda fəaliyyət göstərən bir neçə ticarət obyektində saxta alkoqollu içkilərin satışı ilə bağlı nöqsanlar aşkarlanıb.
Cenublu.az xəbər verir ki, Qida Təhlükəsizliyi Agentliyinin əməkdaşları tərəfindən aparılan plandankənar yoxlama zamanı Cəlilabad rayonu, H.Əliyev prospekti, ev 9 ünvanında yerləşən Quliyev Füzuli Əvəz oğluna məxsus “055 şərab evi” mağazasında, Göytəpə şəhəri, F.Bayramov küçəsi, ev 87 ünvanında fəaliyyət göstərən Qurbanov Hikmət Əliağa oğluna məxsus “Məhəllə” marketdə, eləcə də Cəlilabad şəhəri, H.Əliyev prospektində yerləşən Əliyev Akif Ağaxan oğluna məxsus “Yaşar” marketdə normativ hüquqi aktların tələblərinin pozulduğu müəyyən edilib.
Yoxlama zamanı mənşəyi məlum olmayan saxta alkoqollu içkilər aşkar edilərək satışdan kənarlaşdırılıb. Normativ-texniki tələblərə cavab verməyən məhsullarla bağlı məhdudlaşdırıcı qərar qəbul olunub.
Aşkarlanmış faktlarla bağlı inzibati protokol tərtib edilib, məhsullardan nümunələr götürülərək laborator müayinələrə göndərilib. Araşdırmalar davam etdirilir.
